ما شاء الله .. أسرع ما كنت أتصور .. ( سيتي ووك CITYWALK ) اللي كتبت عنه موضوع (بالصور: ( سيتي ووك CITYWALK ) في دبي هذا الشتاء بيكون هو الـ ( مكان ) !) هنا في المدونة من 3 أسابيع .. كنت أتوقع كمان شهر شهرين .. يعني على مهرجان دبي للتسوق يكون مفتوح ولكن تم الإفتتاح الحين مع بداية فعاليات عيد الأضحى المبارك اللي تم الإعلان عنها في دبي إنها بتكون من 10 إلين 18 أكتوبر 2013.
والسيتي ووك في وسط دبي وبالقرب من برج خليفة ودبي مول يقع بالضبط في منطقة جميرا 1 تقاطع شارع الصفا مع شارع الوصل. ويوصل له باص رقم 7 أو 14 و تقدرون تاخذونه من محطة مترو الخليج التجاري بس إنزلو من جهة البحر ..
واليومين هذي كمان الجو حلو في دبي .. وخذيتها فرضة ومريت عليه أمس و لقيت إن بعض المحلات والمطاعم اللي تم إفتتاحها .. يعني مو كل المحلات ..
ورغم ذلك إلا إن المكان مره جميل .. و الجو جميل .. والمشي فيه متعه .. وأنصحكم في زيارته خلال عيد الأضحى اللي بتكون المولات فيه زحمة زحمة زحمة !!!
انحاشوا .. الهجه الهجه من المولات في العيد .. أو إذا بتروحون روحو عقب 12 بالليل لأنها 24 ساعة بتكون فاتحة إن شاء الله .. وعيدكم مبارك..
الحمدلله ظهر الحق وزهق الباطل 🙂
وكل عام وانتم بخير 🙂