لأن للسفر أبجديات ويجب معرفتها .. أكتب لكم هذا النصائح

اليوم بتكلم معكم في موضوع “السفر” .. لأن فيه ناس كثير يسافرون ولا يحققون الهدف المرجو من السفر .. مع إن أهداف السفر كثيره، يعني فيه ناس يسافرون عشان يشوفون شي جديد وناس روتينيين يسافرون وهم يكررون الأماكن لأنها عجبتهم كثير، وناس ما يسافرون إلا عشان يتشافون مع بني جلدتهم يعني إذا هم سعوديين يروحون الأماكن اللي يتكاثر فيها السعودين مثل باريس ولندن وماربيا ودبي وبيروت .. إلخ

في أي من الحالات كان الهدف من السفر، لأن مهما إختلفت الأسباب الفايدة وحده، وتفضلوا الأجندة التالية اللي إن شاء الله تستفيدون منها:

أول شي لازم صلاة الإستخارة .. عشان إن كتب لكم ربي الرحلة تكون موفقة إن شاء الله.

قبل السفر لازم يكون عندك بطاقة إئتمانية وأنا أفضل تكون ثنتين عشان لو تعطلت وحده الثانية إحتياطي يعني مثلا وحده “فيزا -Visa” والثانيه “ماستر كارد – MasterCard“.. ولو أن البنوك الحين يرسلون لك بطاقة إئتمانية في ظرف 48 ساعة. وكمان لازم يكون معاكم بطاقة صراف وأنا عن نفسي لازم يكون عندي بطاقتين صراف ومن بنكين مختلفين .. برضوا عشان لو خربت وحده الثانية تقضي.

ثالث شي لازم يكون في جيبك مبلغ لا يقل عن 250 دولار عشان بعض الدول تأشيرة الدخول في المطار وبفلوس .. صدق إنهم يقبلون البطاقات ولكن سبحان الله ما يندرى .. وكمان عشان تدفعون للتاكسي لو ما كنتوا طالبين سيارة من الفندق تطلع تستقبلكم في المطار.

نجي الحين لبداية مخطط السفرة، فيه ناس يعتمدون على وكالات سفر هي اللي تسنّعهم وتحجز تذاكر الطيران والفنادق وتعلمهم عن أفضل شي يعني تخطط لك كامل سفرتك .. وأنا عن نفسي أرشح وكالة “داناتا – dnata” لأني أتعامل معهم وبصراحة مره مريحيني. بس مشكلة وكالات السفر هي الشروط عند إلغاء الحجوزات يعني ممكن يستقطعون جزء من المبلغ أو نصه أو كامله لو كان موعد السفر قريب جداً وتم الإلغاء يعني خساير وكبيرة .. بس زي ما قلت بالبداية يريحونك ..

وفيه طريقة الإنترنت وهي إنكم تقومون بعمل حجز التذاكر والطيران عن طريق مواقع شركات الطيران نفسها وارشح السعودية وطيران الإمارات وطيران الإتحاد والطيران العماني والسريلانكية والسنغافورية وكاثي باسفيك حقت هونغ كونغ، وكلهم جربتهم وبصراحة مره روعه سواء على الدرجة الأولى أو درجة رجال الأعمال أو الدرجة السياحية وتعتبر خطوط الطيران اللي ذكرتها من أفضل خطوط طيران على مستوى العالم. ومواقع حجوزات الفنادق الشهيرة مثل Booking.com أو agoda.com وغيرها وطبعا لازم تكون عندك بطاقة إئتمانية مثل فيزا أو ماستر كارد أو أميركان إكسبرس عشان المواقع هذي ما تقبل إلا البطاقات الإئتمانية عشان تعمل الحجز وكمان تعتبر هذي الطريقة سهلة لأن كل شي ممكن تعملونه وإنتم في البيت والإلغاء أسهل شوي من وكالات السفر والطيران.

ثالث طريقة وهي اللي تروح بدون ما تحجز وممكن تتوفق .. وممكن لا .. يعني شختك بختك.. وفي المواسم ما أظن بيكون فيه لا فيه طيران ولا فنادق .. وبتبحلون !

وأهم خطوة من خطوات السفر هي دفتر وقلم وتكتبون فيه عن كل الاماكن اللي تستحق الزيارة بناء عل سؤال ناس تعرفونهم سافروا للمكان اللي معزّمين تروحونه وتعرفون وش رايهم بالمكان ووش أفضل الأماكن اللي تنزار والمطاعم .. والأسواق والشواطئ وغيرها..

ثاني خطوة هي الدخول للإنترنت وقراءة مراجعات الناس في أهم مواقع السفر مثل موقع تريب أدفايزور tripadvisor.com اللي كل الناس تكتب رأيها عن الفنادق أو المطاعم أو الرحلات أو الأماكن اللي قصدوها خلال رحلتهم.

تدورون على الأنشطة والفعاليات والأشياء اللي ممكن تعملونها في الديرة وأفضل موقع ممكن يفيدكم بهذا الشي هو فيتور Viator التابع لتريب أدفايزور، بعني أنو ما تروحون للمدينة عمياني ولا تعرفون شي همن تدجون وترجعون ما شفتوا شي .. طيب فرضاً ما قمتوا بهذي الخطوة .. اصبروا شوي .. ما هي نهاية الدنيا و في خط عوده وهو إن الفندق اللي تسكنون فيه عنده خدمة الكونسييرج – Concierge.. والكونسييرج يعني الحاجب بالعربي ومدري ليه سموها كذا !!

المهم عندكم الكونسييرج أسألوه عن كل شي .. وغثوووووه .. يعني كل شي هو يعمله لكم حجز المطاعم طلب سيارة حجز تذاكر المسرح اللي تبونه يعمله لكم .. وتسالونه عن أهم الأماكن ويعلمكم عنها وكيف الوصول لها .. يعني تنشبون في حلقه وتاخذون كل غريفه .. لكن لو كنتوا تعرفون المكان اللي بتروحونه بس علموه يحجز لكم ..

ومن خلال تجاربي في السفر .. فيه مكان يا حبذا إنكم تستأجرون سيارة بسواق مثل باريس واسطنبول وبيروت .. أفضل من استخدام التاكسي وفيه مدن عادي تستخدمون التاكسي مثل لندن وكمان وسائل التنقل العامة ممكن تستخدمونها في بلدان أوروبية عديده مثل سويسرا والنمسا والدول الإسكندنافية .. والتنقل بين البلدان الأوروبية الغربية ممكن بالسيارة أو بالقطار لأن المناظر من أجمل ما يكون .. وأمريكا ولايات كثيرة لازم سيارة.

الكاميرا جداً مهمة لتوثيق اللحظات الجميلة في السفر .. وفي حال مافيه كاميرا الموبايلات الحين تفي بالغرض ..

نصائح أخيره .. العمر قصير لا تكررون المدن يعني زورا مدن متنوعة سواء من نفس البلد أو بلدان مختلفه يعني لو رحتوا سويسرا وعجبتكم وكانت المدينة اللي زرتوها جنيف المره الثانية روحو سويسرا بس روحوا مدينه ثانيه مثل زيورخ وكذا يعني ..

حاولو تنوعون في سفركم يعني مره سافروا شواطئ ومره مدن ومره جبال ومره روحوا أماكن اللي فيها ربعنا للتشاوف .. التنويع يريح النفسية والتجديد ينعشها .. شوفوا وشلون لو غيرنا أثاث البيت كيف نفسياتنا .. أجل وشلون لو تنوعنا في بلدان العالم ..

واللي عنده نصيحه يقدمها لنا لا يبخل علينا بالرد على هالموضوع بترك تعليق عشان الفايده تعم ويكون الموضوع مرجع لكل شخص مهتم بالسفر

أتمنى لكم ولي سفر جميل مريح ظريف خفيف وموفق 🙂

ولا أنسى إني أقولكم على موقع مجلة وين ؟ مجلة المسافرة العربية .. اللي بتنفعكم كثير بالمواضيع اللي موجودة فيها.