اليوم في حسابي على سناب شات طرحت فكرة لشركة مِيراس اللي أنا شخصياً معجبة في مشاريعها وإدارتها لها، حيث إنها تجمع بين جمال المكان و روح الزمان.
وسميت الفكرة ” ذا بوكس @ بوكس بارك The Box @ Boxpark “، وهي عبارة عن مكان يكون ملتقى للناس بشكل عصري بحيث أي إنسان عنده كمبيوتر محمول أو جهاز لوحي تابليت وحابب إنه يشتغل عليه بعيدا عن المنزل، يلاقي ذا بوكس اللي هي مساحة تكون مخصصة للأعمال بطريقة مختلفة عن باقي الأماكن .. بحيث إنه يكون كأنه بزنس سنتر اللي في الفنادق أو لاونج طيران في المطار يكون جامع لكل الأفكار اللي تجعل الناس تتردد على المكان يعني تتوفر مساحة للتلاقي ومساحة للي يبي يقعد يشتغل على الكمبيوتر وطابعة وشاشة تلفزيون فيها قناة CNBC عربية مثلا.
وكمان ذا بوكس يضم زاوية فيها كتب بحيث اللي يبغى يقر وتكون الكتابات على الجدران والإرشادات باللة العربية وتحتها بالخط الصغير اللغة الإنجليزية.
والكتب تكون ثلاث أرباع لغة عربي وربع أجنبي بحيث يكون التركيز على الخليجين والعرب، في ذا بوكس.
وتتوفر في المساحة قهوة صغير ستايل بحسب المكان بحيث تكون في بوكس بارك عصرية وبطابع شبابي وفي سيتي ووك تاخذ الستايل الراقي وهكذا .. وفي حال نجاح الفكرة تتعمم على كل مشاريع مِيراس ومشاريع إعمار ومشاريع دبي القابضة .. ويكون ذا بوكس @ مِيراس أو ذا بوكس @ إعمار أو ذا بوكس @ جي بي آر وهكذا ..
ولأن دبي مدينة تشجع على الأعمال وتساهم في دعم مشاريع الشباب أتوقع تعميم الأماكن اللي تكون ملتقى للمهتمين بساعد أكثر في إسعاد الناس في دبي اللي تزرع في قلوب الجميع البسمة مع المبادرات الجميلة اللي نلمسها كل يوم.
وكمان صلحت شعار مثل شعارات مِراس وحطيت صورة البوكس اللي يستخدم في تخزين الأوراق المكتبية ..
