وين بتروحون هالصيفية ؟ سفر ترزز ! أو سفر إستكشاف !

6 يونيو آخر يوم في إمتحانات الطلبة في السعودية وبتبدأ الإجازة الصيفية اللي هالسنة رمضان في نصها بالضبط يعني اللي بسافر لازم يحدد يا قبل رمضان يا بعد رمضان، وإن كان بعد رمضان صعبه لأن اسبوع وتبدأ الدراسة بعده .. يعني ما يمدي..

ودي نسولف وين بتروحون هالسنة ووش المكان اللي تتمنون تزورونه وتستكشفونه ومتى راح يكون قبل رمضان أو بعده وليه.

ووش نوع السفر اللي تفضلونه يعني سياحة شاطئية أو جبلية أو سياحة المدن أو سياحة التسوق .. وفيه نوع خاص فيني يالخليجيين وهو سياحة “الترزز” وهي سياحة متركزه بمدن معينة وفي أوقات معينة وأماكن معينة .. أنا شخصيا جتني فترة ترززت بس وبعدين ! حامت كبدي من جد.. أوكي لبست وكشخت وشلت شطنة سعرها غالي وطبعاً لازم تبيّن وش ماركتها وإلا وشوله تنشال 🙂 وجزمة اللي يعزكم بالشي والشويات ولازم تكون جزمة صح غالية ومتّرت الشارع فيها .. وبعدين ؟ لا شفت شي في المدينة اللي رحت لها ولا إكتشفت شي ! ما غير ترزز في نفس الأماكن ونفس القهاوي ونفس المطاعم .. جدول منضبطين عليه ومدري وش نلاحق و مين نلاحق ، ولا أدري ليه متمسكين بعادات كانو آباءنا يعملونها في السبعينيات من أربعين سنه .. بس قولوا في السبعينيات الظروف غير .. بس الحين وش الحجة .. ولو مرة تأزمت وأبغى أترزز مو كل سنة يعني مرة كل 3 أو 4 سنين مو مشكلة بس طول الوقت ترزز .. لا طبعاً !

المهم نرجع لموضوعنا وش المدن اللي ممكن تكون خيارات لكم ، أنا أشوف إن أغلب الناس تفضل أماكن بارده وطبيعتها تختلف عن طبيعة بلادنا الصحراوية. وبكذا تكون أوروبا هي “المكان” لأن الجو يكون في الصيف من أروع ما يكون، وكمان تمتع أوروبا بطبيعة خلابة وطمان لأنها حضارات وتاريخ عدا عن البنية التحتية اللي تساعد في التنقل بسهولة والإستمتاع بالرحلة، وإن كنت أعيب عليها الأسعار النار.. وخصوصا في موسمها.وهالسنة فيه الأولمبياد في لندن وماعلينا من أمم أوروبا لأن مالنا لا في أكرانيا ولا في بولندا.
أمريكا الشمالية وكندا خيار مرة جميل لأن الأسعار ممتازة وأرخص من أوروبا بكثير وإن كنت بس أشيل هم المسافة الطويلة.
أستراليا مش خيار لأنها شتاء الحين وكمان شرق آسيا لأن هالوقت من السنة هو موسم الأمطار في شرق آسيا .. عشان كذا غلطان اللي يروحها في الصيف هي حلوه في الشتاء .. الجو يكون رائع فيها.
الدول العربية في هالصيفية بالذات في مخاطرة في السفر لها بسبب الظروف الراهنة، والله يصلح الحال وترجع لنا أفضل مما كانت يارب.

ونجي لمهرجانات الصيف:

اسطنبول لأول مرة في الصيف jتقيم مهرجان وهو “مهرجان اسطنبول للتسوق” واللي يقام ما بين 9 يونيو إلى 29 يونيو ويعتبر ثاني مهرجان لأن الأول قبل كذا كان في الربيع.
وطبعاً فيه دبي وفصل الصيف هو فصل سياحة المولات والعروض والتخفيضات والفعاليات و”مهرجان صيف المفاجآت” وفعاليات مدهش الـ 15 و اللي من 14 يونيو إلى 14 يوليو.
وكمان فيه مهرجان “صيّف في أبوظبي” وهوعروض وأنشطة للعائلات والمهرجان من 21 يونيو إلى 19 يوليو.

وبعد هالبربره الواجده .. علموني وين بتروحون .. ترا ذابحتني اللقافة .. وهناكم العقلان لمى ووبنان ومي .. اليوم 31 مايو وبكره 1 يونيو وكل عام وأنم بخير 😉