قبل يومين رحت لمطعم ” سيركل كافيه Circle Cafe “، اللي موجود في مركز ( جميرا بيتش بارك بلازا ) في شارع جميرا مقابل فندق الفورسيزونز دبي ومو بس هذا المكان الوحيد له بل يوجد له فروع كثيرة في دبي، و هذا المقهى ما هو غريب عني لأني أروح بين فترة وفترة للفرع اللي في منطقة الصفوح 2 وبالتحديد في مدينة دبي للإعلام لأنه قريب من بيتي.
وهذي المرة فضلنا الذهاب للفرع اللي له إطلاله مباشرة على البحر لأنه في الطابق الثاني من المركز .. وتمتاز ديكورات المكان بالستايل العصري الجذاب والمريح و يطغى عليه اللون الابيض في الكراسي مع انسجام تام مع الجدران الداكنة وبعض التطعيمات الخشبية اللي لاحظتها في الطاولات الكبيرة.
ويشتهر عن المطعم تقديمه لوجبات الفطور المميزة وكمان عندهم السطات الطازجة اللي تتعدد أنواعها بالإضافة إلى الأطباق الرئيسية والحلويات.
والجميل في المطعم هو الاستقبال اللطيف من قبل طاقم العمل اللي استقبلونا بإبتسامة وترحاب وعلى طول نصيت الجلسة اللي بجانب الزجاج مع إطلالته على شارع جميرا والبحر.
في البداية طلبنا مقبلات طبق عبارة عن ثلاث أنواع من الصلصات مع الرقائق وبعدين طلبنا سلطة الدجاج بالصلصة الحارة وكطبق رئيسي وقع إحتياري على سمك السلمون المشوي .. مذاقه رائع جداً.
والختام مع طبق الأوريو موس وكان لذيذ مره وأنصح فيه، وكان لابد يكون بصحبة القهوة.
تجربة جميلة جداً ومقهى مميز يقدم الطعام الطازج في أجواء هادية ورايقة وكما يتوفر عندهم الواي فاي المجاني.
وطبعاً عملت قصة مصورة بالفيديو لزيارتي للمطعم في يومياتي على سناب شات اللي تقدرون تتابعوني فيها تحت هذا الاسم: wainblog
