مدونة وين ( هلا الجريد ) ؟ ! Lifestyle & Travel blogger

سيرة ذاتيه:

سعودية .. سنابيه .. مدونة سفر وأسلوب حياة.

اسمي ( هلا بنت ناصر بن جريد ) و بديت في التدوين أو بالأصح دخلت عالم المدونات والمدونين في عام 2010 بس قبل كذا كنت عضوة فاعلة في كثير من المنتديات وبالطبع كانت أغلبها في نادي بنت نت.

أحب أعيش حياتي بدون اي تكلف أو تعقيد وأحب أشوف كل شي جميل لو كانت الحياة في بعض أحيان تكون نسبة الجمال فيها أقل من نسبة القبح، ولولا وجود القبح ما أحسسنا بالجمال.

أعشق الفنون الجميلة كلها .. رسم، نحت، شعر، مسرح، رقص، سينما، موسيقى..

أحب القراءة في التاريخ و الأدب والفن .. وأحب أجلس على القهوة بالساعات..

أنا من مواليد برج ! وإلا تدرون ماراح أقول أنا برجي إيش لأن بصراحة صرت ما أؤمن في هذي الاشياء من تالي، بس عن قولة .. ترني برج الثور : )

كنت أعتبر نفسي بوهيمية بس في الحقيقة أنا مش بوهيمية ..

مدني المفضلة جداً سويسرا كلها ودبي ولندن وهونغ كونغ وإسطنبول والقاهرة..

أحب السيارات الصغيرة جداً مثل ميني كوبر أو فيات 500 أو البيتل..

أعشق السفر وإن كان السفر بالقطار أعتبرة متعة لا تظاهيها متعة ..

الجبال والطبيعة الخلابة تأسرني وأحب المطبخ الفرنسي في الأكل لأن أعشق طعم الماسترد.. وأعشق شي اسمه شوكولاته.

أحب المطر مثل كثيرين مننا يالخليجيين اللي نحب المطر ونتشفقه..

ألواني المفضلة : الأبيض ، البرتقالي ، العنابي ، البيج ، البني و الرمادي ..

و من العطور أحب منه دهن العود والعطور اللي فيها عنبر ..

مؤسسة ومديرة تحرير مجلة وين ؟ .. أول مجلة إلكترونية مخصصة للمسافرة العربية.

و ( مدونة وين ) هي مدونتي اليومية واللي هي عبارة عن بيتي الثاني وهي مدونة “لايف ستايل وسفر وسوق وطعام وفنون” .. أصيد فيه كل جديد وأكتب عن اللي أنا أعيشه واللي راح كل يوم أكتب وش يصير لي في هذي الحياة من سوالف أو قصص أو أسواق أو أماكن مثل مطاعم حلوة أو فنادق جميلة عرفت عنها وزرتها أو افلام شاهدتها .. وكل شي يدور في بالي سواء زين أو شين و آرائي في الدنيا وفي الناس بشكل محايد، يعني تقدرون تقولون عني Food & Travel Blogger.

وإن شاء الله تعجبكم المدونة وتعجبكم إختياراتي !

وصيداتي وسوالفي تقدرون تشوفونها وتسمعونها في يومياتي على الـ سناب شات wainblog اللي حاليا يشاهدها الآلاف من حول العالم 🙂